Дзень роднай мовы

         21 лютага ва ўсім свеце адзначаецца Міжнародны дзень роднай мовы. Мова – душа народа, векавая памяць многіх пакаленняў, наш галоўны нацыянальны скарб. Жыве мова – жыве народ, жыве памяць продкаў.

Беларуская мова стаіць на другім месцы пасля італьянскай па мілагучнасці. На ёй цудоўна гучаць як народныя спевы, так і опернае выкананне; як поп музыка, так і рок.

          Папулярызаваць мову, паказаць яе адметнасць, унікальнасць і заахвоціць карыстацца ёю. Менавіта такую мэту ставілі перад сабой супрацоўнікі Пастаўскай дзіцячай бібліятэкі імя У. Дубоўкі, калі праводзілі агульнагарадскую дыктоўку, прысвечаную роднай мове. Загадзя былі дадзены аб’явы ў сацыяльных сетках, на тэлебачанні і ў раённай газеце. На дыктоўку прыйшлі як дзеці, так і дарослыя. І што вельмі парадавала – многія прыйшлі сем’ямі. Перад пачаткам дыктоўкі вядучая павіншавала ўсіх з надыходзячым святам – Міжнародным днём роднай мовы.

 Потым адбылася дыктоўка. Тэкст быў выбраны паводле ўрыўка з твора

У. Караткевіча “Родная мова”. Дыктоўка праходзіла ў сяброўскай, вясёлай атмасферы. Пасля дыктоўкі была прапанавана віктарына, дзе ўдзельнікі складалі фразеалагізмы, перакладалі з беларускай мовы на рускую, адказвалі на мовазнаўчыя пытанні. За правільныя адказы кожны атрымаў сувенір на памяць.

       Калі прыйшоў час разыходзіцца, многія выказвалі словы ўдзячнасці за арганізацыю і правядзенне дыктоўкі. Вельмі прыемна, што наша работа знаходзіць водгук у сэрцах пастаўчан.

Родная мова, цудоўная мова!

Ты нашых думак уток і аснова!

Матчын дарунак ад самай калыскі,

ты самацветаў яскравая нізка…

У. Дубоўка

1,370 про­смот­ров все­го, 4 про­смот­ров сего­дня